Perisak Juuso - AIDA-project - Arctic Indigenous Design Archives

Perisak Juuso

(r.1953)

Duojár ja dáiddár

Perisak Juuso riegádii jagis 1953. Son lea šaddan Nearvvás olggobealde Gárasavvona, doppe son ain eallá ja bargá.
Perisak Juuso lea eallán veagas gos duddjoje veaga buot dárbbuide. Vuođđu su oidnui duodjái lea dasto čiekŋalis máhttu ávdnasiid ja árbevirolaš duddjoma birra. Seammás lea son váldán oahpu hábmemis ja metállas, ja pedagogihkas. Go son dovdá ovddasvástádusa doalvut su máhtu vildaseabbo lea son bargan oahpaheaddjin Sámij Åhpadusguovdásjis ja Sámi Allaskuvllas Guovdageainnus.

Perisak Juusos barggut leat rádjeeatnamiin duojis, dáiddaduojis ja dáidagis. Su dábáleamos ávnnas lea muorra ja čoarvi, muhto geavaha maiddái metálla ja tekstiilla. Son lea njunnošis ovddidit ođđaáigásaš duoji. Su barggut bidjet jearaldagaid mii lea innovašuvdna ja mii lea árbevierru. Perisak Juuso oaivvilda ahte duoji ovdáneami ja ođasmahttima vuođđu ferte leat nana árbevierru. Lea dárbbašlaš jus galgá sihkkarastit ávkkálaš sisdoalu ja maiddai buori dási.


Sus leat leamaš čájáhusat Sámis ja miehtá máilmmi; earret eará Kanadas, Jáhpanis, USA:s ja Islánddas. Son lea ožžon ollu bálkkašumiid. Jagis 2012 oaččui son Sámi Dáiddaráđi stipeandda.

Arkiiva

Vuorkkás lea čállosat čájáhusain, árvvoštallamat ja áviisačállosat, reivvet ja govat sihke dáidagiin ja proseassain. Vuorkkás leat maiddái dávvirat main leat vissis gáržžideamit. Vuorkkás leat maiddái barggut mat eai lihkostuvvan bures. Dáid bargguid ožžot dušše Sámij Åhpadusguovdásja ja Sámi allaskuvlla oahppit oaidnit oahpaheami oktavuođas.

[AJTTE]