Kampánja & čájáhus - AIDA-project - Arctic Indigenous Design Archives

Kampánja & čájáhus

#MUDUODJEARKIIVA

Háliidatgo veahkehit muitalit mii duodji lea? Juoge du duodjearkiivva!

Sosiála media kampánja - čájáhus

#muduodjearkiiva #mudáiddaarkiiva #muvduodjevuorkká #movvætnoevåarhkoe #muutuâjjarkiiv #muutyejiarkkâdâh #mittduodjearkiv #duodjiarkistoni #myduodjiarchive



#Muduodjearkiiva lea dál @Muduodjearkiiva ▷

Čakča 2020 álggahii hástalusa #Muduodjearkiiva – Juoge du duodjearkiivva! Dál mii vuosehit bohtosa erenoamáš cájáhusas.

@muduodjearkiiva čájáhus

@muduodjearkiiva lea instagram-čájáhus, mii buktá oidnosii 14 oassálastti vásáhusaid iežaset duodjearkiivvas govaiguin ja teavsttaiguin, mat leat juhkkojuvvon hastaggiin muduodjearkiiva ja vástideaddji hashtaggaiguin. Čájáhus lea juhkkojuvvon fáttáide: arkiivvat ja arkiivamateriálat, duodji ja dáidda sihke proseassa ja dahkki. Ulbmilin lea leamašan maiddái čájehit oassálastiid govaid nu ovttalaš ollisvuohtan go vejolaš. Digitálalaš čájáhusplatforman (vuložin) Instagram dahká vejolažžan lihkadit ollisvuođa ja ovttaskas govaid gaskkal. Ovttaskas govaid duohken fas gávdná ođđa govaid ja filmmaid, mii dahká ollislašvuođas máŋggadimenšuvnalažžan.

Čájáhusa oktavuođas bivdit du valdit vuhtii ehtalaš geavadiid mat laktásit govaid juohkimii sosiála medias dahje eará geavahusas. Mii sávvat ahte don gudnejahtát oassálastiid dahkkivuoigatvuođaid govaide ja sisdoaluide.

Mielde čájáhusas leat: @astu.design, @duodjibylise, @elleduodji, ElleMina Kuoljok Baer, @elinakuhmunen, @elsalabbaduodji, @houseofduodji, Ida Maria Marakatt, @juksahkka, @njlabba, Paulus Kuhmunen, @perisakjuuso, @samiskakocken /Kristoffer Åström ja @ulrikatapioblind.

Joatkke juohkit iežat duodjearkiivva!

Du duodjearkiivii gullat visot mat leat seastán duddjodettiin. Buotlagan materiála mat guoská du duodjeeallimii; áviisačállosat, govat, ávnnasovdamearkkat, eahpelihkkostuvvan duojit, geavahuvvon duojit, duodjebázahusat, minsttarat, reivvet, eksperimeanttat, reklámat jnv. Juohkehaččas leat arkiiva, vaikko eai soaitte jurddašit dan birra.

Du duodjeárkiivvas lea árvu. Dat addá ipmárdusa duodjái.

Mo sáhtan searvat

1. Juoge gova Instagrammis, muital mii dat lea ja manin don leat vurken juste diet materiála.

2. Merke gova: #muduodjearkiiva dahje #mudáiddaarkiiva vai eara gielaide: #muvduodjevuorkká #movvætnoevåarhkoe #muutuâjjarkiiv #muutyejiarkkâdâh #mittduodjearkiv #duodjiarkistoni dahje #myduodjiarchive.

3. Merke maid @muduodjearkiiva ja mii bidjat muhtin govaid min siidui.

Go searvvat de addat midjiide lobi seastit gova AIDA prošeavtta arkiivii* ja vel almmuhit gova ja teavstta AIDA II prošeavttas. Ovdamearkka dihte min ruovttosiiddus, blogsiiddus, čájahusas, sosiála medias jnv.

Somá jus searvva!

AIDA prošeavttas gávdno juste dál 24 duojárarkiivva Ájtte museas ja Sámi arkiivvas, somá vel ahte eanet skeŋkejumit lea boahtime. Min ruovttosiiddus https://kansallisarkisto.fi/aida/sa/duojar-arkiivvat oainnat skeŋkejuvvon duojárarkiivvaid mat gávdno Ájtte museas Johkamohkis ja Sámi arkiivvas Ánaris. Soaittat gávnna inspirašuvnna iežat arkiivii.


#deladuodje ja #delavantar lea sullasaš kámpanjat mat leat inspireren dán #muduodjearkiiva kámpanjii.

*Go searvvan #muduodjearkiiva kampanjai iežan duodjearkiiva-govain sosiála medias, de luobahan dan govvamateriála Suoma Riikkaarkivii dutkiid ja eará dieđu dárbbašeddjiid friddja atnui láhkaásaheamis (ee. diehtosuodjeláhkaásaheapmi) biddjon ráddjehusaid mielde.

Materiála seailluhuvvo digitála hámis Riikkaarkiivvas AIDA-arkiivva oassin.
Lassedieđut: Sámi Arkiiva, Tel.+358 50 408 3062, kirjaamo@kansallisarkisto.fi